ಜಿಲ್ಲೆಯ ಪಾರಂಪರಿಕ ಸ್ಮಾರಕ ಪಟ್ಟಿಯಲ್ಲಿ ಜಾವಣಿಗೆ ಸೀಮೆಯ ಪಾಳೇಗಾರ ನಾಡುಮನೆ ದ್ಯಾವಣ್ಣಗೌಡರ ಮನೆ ಸ್ಥಾನ ಪಡೆದುಕೊಳ್ಳಲಿ.*
1 min read
ಅವಿನ್ ಟಿವಿ ಸುದ್ದಿಜಾಲ ✒️: *ಜಿಲ್ಲೆಯ ಪಾರಂಪರಿಕ ಸ್ಮಾರಕ ಪಟ್ಟಿಯಲ್ಲಿ ಜಾವಣಿಗೆ ಸೀಮೆಯ ಪಾಳೇಗಾರ ನಾಡುಮನೆ ದ್ಯಾವಣ್ಣಗೌಡರ ಮನೆ ಸ್ಥಾನ ಪಡೆದುಕೊಳ್ಳಲಿ.*
ಇದು ಕುಂಭಕ ಸಾಂಸ್ಕೃತಿಕ ಪ್ರತಿಷ್ಠಾನದ ಪುಸ್ತಕ ಓದು ಸಂವಾದ ಕಾರ್ಯಕ್ರಮ…..
ಇತಿಹಾಸದ ಕಲೆಗುರುತುಗಳು ಮತ್ತು ಅ ಕಲೆಗುರುತುಗಳಲ್ಲಿ ಅಚ್ಚೊತ್ತಿರುವ ಕಲೆ,ಸಾಹಿತ್ಯ ಸಂಸ್ಕೃತಿ,ಜನಜೀವನ, ಜನಸಾಮಾನ್ಯರ ಅಸಮಾನ್ಯ ಬದುಕಿನ ಯಶೋಗಾಥೆಗಳ ಕುರುಹುಗಳು ಅಲ್ಲಲ್ಲಿ ಇಂದಿಗೂ ನಮ್ಮ ಹಳ್ಳಿಗಳಲ್ಲಿ ಕಾಣಸಿಗುತ್ತವೆ.
ಇಂತಹ ಇತಿಹಾಸದ ಕುರುಹುಗಳಲ್ಲಿ ಒಂದಾದದ್ದು ಚಿಕ್ಕಮಗಳೂರು ಜಿಲ್ಲಾ ಕೇಂದ್ರಕ್ಕೆ ಸಮೀಪವಿರುವ ಮಳಲೂರು.
ಈ ಮಳಲೂರನ್ನು ಜಾವಣಿಗೆ ಸೀಮೆಯ ನಾಡು ಎಂದು ಕರೆಯುತ್ತಾರೆ, ಸುಮಾರು ಹದಿನಾರು ಹಳ್ಳಿಗಳಿಂದ ಕೂಡಿದ ಈ ಜಾವಣಿಗೆ ಸೀಮೆಯ ನಾಡಿಗೆ ಮೈಸೂರು ಸಂಸ್ಥಾನದ ಅರಸರ ಆಳ್ವಿಕೆಯ ಛಾಯೆಯಿದೆ.
ಇಂತಹ ಜಾವಣಿಗೆ ಸೀಮೆಯ ನಾಡನ್ನು ಆಳಿದ ಪಾಳೆಗಾರ ನಾಡ ಮನೆ ದ್ಯಾವಣ್ಣ ಗೌಡರ ಆಳ್ವಿಕೆಗೆ 16 ಮತ್ತು 17ನೇ ಶತಮಾನಗಳ ಇತಿಹಾಸವಿದೆ, ಮಳಲೂರಿನಲ್ಲಿ ಈ ಪಾಳೇಗಾರ ನಾಡುಮನೆ ದ್ಯಾವಣ್ಣಗೌಡರ ಮನೆ ಮತ್ತು ಆ ಮನೆತನದ ವಂಶಸ್ಥರು ಈ 16ನೇ ಶತಮಾನದ ಹಿಂದೆಯೇ ಅಂದರೆ 12ನೇ ಶತಮಾನದಲ್ಲಿ ಕಲ್ಯಾಣದ ಶರಣರ ಸತ್ಕ್ಕ್ರಾಂತಿಯ ವಿಪ್ಲವದ ನಂತರ ಕಲ್ಯಾಣದಿಂದ ಇಲ್ಲಿಗೆ ವಲಸೆ ಬಂದವರು ಎಂದು ನಂಬಲಾಗಿದೆ, ಅಂದಿನಿಂದ ಇಂದಿನವರೆಗೂ ಈ ಗ್ರಾಮದಲ್ಲೇ ಈ ಮನೆತನ ನೆಲೆಯೂರಿದೆ. ಈ ಮನೆತನ ಮೈಸೂರು ರಾಜ ಮನೆತನದ ಅಡಿಯಲ್ಲಿ ಪಾಳೇಗಾರರಾಗಿ ಶತಶತಮಾನಗಳ ಕಾಲ ಆಡಳಿತ ನೀಡಿದ ಇತಿಹಾಸ ಈ ನೆಲದ ಜನಪದ ಸಂಸ್ಕೃತಿಯೊಳಗೆ ಇರುವುದನ್ನು ಕಾಣಬಹುದು.
ಗತಿಸಿ ಗತಕಾಲಕ್ಕೆ ಸರಿದಿರುವ ಇಂತಹ ಇತಿಹಾಸವನ್ನು ಕುರಿತು ಸಾಹಿತಿ ಕುಂದೂರು ಅಶೋಕ್ ಅವರುಹೊರ ತಂದಿರುವ ಪುಸ್ತಕ *ಜಾವಣಿಗೆನಾಡ ಸಂಸ್ಕೃತಿ ಮತ್ತು ಮಳಲೂರಮ್ಮನವರ ಜನಪದ ಜಾತ್ರೆ*
ಇತ್ತೀಚೆಗೆ, ಈ ಪುಸ್ತಕವನ್ನು ಕುರಿತು,ಕುಂಬಕ ಓದುಗ ಬಳಗದ ವತಿಯಿಂದ , ಮಳಲೂರಿನ ಪಾಳೇಗಾರ ನಾಡಮನೆ ದ್ಯಾವಣ್ಣಗೌಡರ ಮನೆಯ ಪ್ರಾಂಗಣದಲ್ಲಿ ಪುಸ್ತಕ ಓದು ಮತ್ತು ಸಂವಾದ ಕಾರ್ಯಕ್ರಮ ನಡೆಯಿತು.
ಈ ಮನೆತನದ ವಂಶಸ್ಥರು, ಸಾಹಿತಿಗಳು,ಲೇಖಕರು ಕವಿಗಳು,ರೈತಪರ ಮತ್ತು ನೀರಾವರಿ ಹೋರಾಟಗಾರರು, ಉಪನ್ಯಾಸಕರು ಮತ್ತು ಗ್ರಾಮಸ್ಥರು ಈ ಸಮಾರಂಭದಲ್ಲಿ ಭಾಗಿಯಾಗಿ ಪಾಳೇಗಾರ ನಾಡಮನೆ ದ್ಯಾವಣ್ಣ ಗೌಡರ ವೈಭವದ ದಿನಗಳನ್ನು, ಅವರ ಸಾಹಸಗಾಥೆಗಳನ್ನು, ಜನನಾಯಕರಾಗಿ ನೀಡಿದ ಆಡಳಿತವನ್ನು ನೆನಪಿಸಿಕೊಂಡು, ಜಾವಣಿಗೆ ಸೀಮೆಯ ಈ ಸಿರಿ ಸಂಪದವನ್ನು ಮುಂದಿನ ತಲೆಮಾರಿಗೆ ಪರಿಚಯಿಸಿ ಕೊಡುವ ನಿಟ್ಟಿನಲ್ಲಿ ಓದು ಮತ್ತು ಸಂವಾದದಲ್ಲಿ ಪಾಲ್ಗೊಂಡರು.
••••••••••••
ಡಿ.ಎಂ. ಮಂಜುನಾಥಸ್ವಾಮಿ
ಅವಿನ್ ಟಿವಿ ಸುದ್ದಿ ಜಾಲ…. ✒️
ಚಿಕ್ಕಮಗಳೂರು
About Author
